Thursday, February 25, 2010

حتى يوم يخب عليه



ماراح أتكلم وابد عن هاليومين وفرحة الناس فيهم ...

لان الإخوان والخوات في المدونات ماقصروا ..

ولكن اعتب على اللي يخصص 24ـ25 فبراير فقط (للفوم) والأغاني الوطنية ..

المفروض الدولة تخصص أنشطة ثقافية تبين أهمية استقلال وتحرير الكويت تحاكي جميع الفئات من الأطفال عن طريق مسرحيات أو كرتون ..

أو للشباب عن طريق فعاليات او معارض ...

******

قعدت من النوم وابتديت روتيني بقراءة جم جريدة وطبعا لازم يطلع لنا جم واحد يسم بدنا ..

مثل الأخ (....)

كنت اعذر الأشخاص اللي تسمي العيد الوطني باليوم الوطني من باب حرية الرأي ..

ولكن وصلت لدرجة حتى كلمة يوم مستخسرها !!!

أظن حتى طويل العمر Google طلع وطني أكثر منك ..


سؤال عرفتوا من هالكاتب :)

الرجاء وضع الإجابة في الصندوق المخصص ويكن تربحون معانه برنامج تلفزيوني أو زاوية في صحيفة أو على الأقل ندوات دينية ..

وطبعا كل هالامور من فلوس ناقلاتنا ...

آسف صاحبنا طلع براءة ومو بايق شي ..

******

الله يعطيني طول البال على الأشكال اللي ماتطلع إلا وقت المسيرات

******

اللهم

ارحم شهدائنا


10 comments:

  1. كبر الدماغ يا باشا

    والكويت اكبر من اي كلام

    وخلنا نعيش العيد وليس اليوم

    الوطـــني

    ReplyDelete
  2. اول شي كل عام وكويتنا بخير..

    والله يحفظها لنا يارب..

    وزين انه خصوص ايام للمسيره ..

    وجان زين مخصصين شوارع معينه بعد ..

    ونبي بوفيهات بعد خخخ..

    ماعرفت الريال بس يشين التفلسف..

    مشكور..انت مو اهو :)

    ReplyDelete
  3. أى والله هالأشكال بس تطلع بالعيد الوطنى


    بس أنت لما تشوفهم قول الحمد لله انك ليس مثلهم

    تحياتى الحاره

    ReplyDelete
  4. كل عام والكويت بخير

    واللي يحز بالخاطر الحووسه بالمسيرات

    والصبي اللي دهسته سيارة

    المفروض يسكرون الشارع ويمرون فرق ومجموعات تساهم بالمسيرة وتتدرب من قبل فتره لهذا اليوم



    مو احلى من الفوم :)

    ReplyDelete
  5. كل عام والكويت وشعبها بألف خير :)

    ReplyDelete
  6. عاد توه امي تقول وين احتفالات قبل واحتفالات الحين

    الحين مايعرفون الا هالفوم عيزوا واهما يقولون مضر بس عمك اصمخ

    ReplyDelete
  7. *أبو الدســتور :
    اذا كبرت الدماغ زود اخاف انفجر ..
    على قولتك كل عام والكويت وانت بخير ..

    *رورو الشخبوطة :
    وانتي بصحة وسلامة اختي ..
    مانبي بوفيهات نبي يمنعون المتوحشين بس عن المسيرات عشان اتخف المشاكل ..
    واذا عن البوفيهات ماتوقع انتي قصرتي بالعيد :) بالعافية ...

    *panadool :
    المشكلة الديرة ماصارت لنا ..
    اهل الديرة قاموا ينحاشون وقت الاعياد والسبة هالااشكال اللي تشوه اسم الكويت واسماء شهدائها ..

    *Crazy Girl in aGood Way :
    المفروض اشياء وايد ..
    نبي شي سنع على الاقل ..
    رفيجي عنده ضيوف من الامارات انقص ويهه المسكين منهم بسبة اللي شافوه ..
    كل عام وانتي بخير اختي ..

    *شاي الصحى :
    وانتي بصحة وسلامة بنيتنا ...

    *Made n Q8 :
    الوالدة من القهر خلت اخوي الصغير ينزل لها من اليوتيوب احتفالات العيد الوطني ملوت قبل الغزو وقاعدة تتحسر والله ..

    ReplyDelete
  8. لووول ليش زعلان ؟

    انا مو غاثني الا المسابقات الهبلة الي يسوونها شباب يناقزون والي يفوز والي مادري شنو شهالخبال ؟

    ReplyDelete
  9. صدقت والله يا خوي بكل كلمة ذكرتها

    اللهم ارحم شهداء الكويت

    سعيد جدا لاكتاشف مدونتك الجميلة

    :)

    ReplyDelete
  10. *طموحة مملوحة :
    زعلان على الحالة اللي تقص الويهه يدام الضيوف ..
    المفروض عيدنا الوطني وعيد التتحرير يصيرون مفخرة مو مصخرة ..

    *عثماني :
    حياك الله اخوي اتشوف فيك وبرايك ..

    *Sharm :
    وانت بصحة وسلامة اخوي

    ReplyDelete