تكفى علمنا

اليوم والجو بديع وجميل قلت باخذ شلالتي وأروح اقعد بكافيه جميل اشرب قهوة واقلب صفحات النت ..

وكانت الرحلة جميلة وسلسة من بيتنا الى قريب شرق ..

ولكن أول ماقربت من الكافيه ..

صخر يمشي , شجر يركض , إشارات تصرخ , سيايير تبجي , ناس تشبق بعضها ويحمدون الله ..

اشصاير بالدنيا !!

الشمس اطلعت من المغرب اليوم ؟ لا

طاحت القروض ؟ لا

اكتشفنا حياة بكوكب ثاني ؟ لا

خلص الفساد بالديرة وبنصير اسعد شعب بالعالم مثل الكفار الدنمارك ؟ لا

انزين يا جماعة الخير اشصاير وشسالفة ؟ جاوبتني احدى السحب التي كانت تظلل الناس وقالت : ماتدري إن الشيخ مشاري الخراز يبي يعلمنا اشلون نتعامل مع الله في مسجد الدولة ..

.....

طبعا بحكم اني مواطن صالح سألت جم سؤال ...

1-الناس من 1400 سنة ماعرفت اشلون تتعامل مع ربها والحين بيصيرون مسلمين صجيين ولازم احد يعلمهم ..

2- لان الناس يايين يعرفون ربهم المفروض زحمة وكل واحد يوقف أي مكان على كيفة واللي يوقف على الرصيف ويكسر ويخرب مرافق الدولة لان يبي يعرف الله بسرعة ..

3-كل سنة تقام الفعاليات الدينية وتخرج لنا الصحف وتقول حضر المحاضرة 20 الف شخص وتغيرت حياة 94% منهم .. عليهم بالعافية

بس اذا شفنا واقع الديرة واشلون الفساد منتشر والطائفية والقبلية والطبقية منتشرين نتعجب يعني معقولة الناس طايحتله محاضرات وندوات دينية واخر شي مانلاقي تأثير على الناس الا بالمساجد ..

4- وليش لغاية الان الناس تحتاج احد يعلمها ابسط مبادئ الدين .. ولازم احد يعلمنا ويقهمنا ونهز رؤوسنا وتنتهي المشكلة ..

5- اذا قال احد الليبراليين ابي أي مكان من مرافق الدولة عشان اسوي ندوة او فعالية اتوقعون شنو الرد ؟

6- الى متى ندوات دينية فقط .. ليش ماشوف ندوة تبين مخاطر الاحتباس الحراري وشنو دور الفرد والمجتمع او عن التطور العلمي الحاصل

****

ادري طولت عليكم ولكن اخر سؤال يقرقع بقلبي ..

على أي مبدأ نسمي الشخص شيخ دين ؟؟ (يبيلة موضوع بروحه هذا )