كلنا نفرين بالديرة ومليون جريدة مو مشكلة ديمقراطية ، بس على الاقل نتمنى انها تلتزم باخلاق المهنة .. و هذا رأيي بالصحف الكويتية
صحيفة الوطن : تخصص مهاجمة التيار الشعبي , انتقاما من هجوم الشعبي المستمر على علي الخليفة واتهامه بالسرقة
الراي : تقراها وماتطلع منها بشي مفيد الا الفضايح , احسن جريدة تلعب بالكلام وتدور مشاكل الديرة الصغيرة وتضخمها .
السياسة : تخصص مهاجمة إيران وسوريا وحزب الله , نقدر انقول عنهم الفجور في الخصومة .
الطليعة : سؤال هالجريدة للحينها تصدر ؟
القبس : صحيفتي المفضلة بس تميل للتيار الليبرالي اشوي , ومواضيعها العلمية حلوه .
صحيفة الان الالكترونية : تخصص اثارة فتن بين الشيعة والسنة والبدو والحضر , لكي تزيد التعليقات فيها , وبالطبع الحين تمت مهاجمة روبن هود اسف زايد الزيد فا شبعوا لطم .
الرؤية : تتبع التيار السلفي واذا قتلهم شيعة حاشتهم حساسية .
جريدة الجريدة : رئيس التحرير خالد هلال المطيري , يعني فيك خير هاجم الليبرالية عندهم , وعلى فكرة ماسمعنا شي منهم على سالفة مشروع الصبية . ممممم يمكن لان واحد من جماعتهم راسية عليه المناقصة .
الشاهد : الصراحة ماشفت بحياتي جريدة تطلع اخبار مفبركة وجذب كثرها , بس تحية لهم يعرفون اشلون يخلون الناس تشتريها عن طريق اشاعاتهم . الجمهور عاوز كده .
الصباح : يعني شنوا ذا صار الليل مانقراها ؟
الانباء : متمسكة بالحياد , بس مالها قراء وكتابها يبيلهم update .
الدار : لاهل بنيد القار , الصراحة من الوانها المفروض ينعرف توجهها , و ودي اشوف سني يكتب فيها , والصراحة كتابها الواحد ماياخذ منهم فايدة .
اسف اذا في جرايد ماذكرتها مثل عالم اليوم , اوان , مكان , لاني بصراحة ماشوفهم الا عند الخباز يعني لا يطبعون مقالات احسن خل يوفرون فلوس الحبر وبس عناوين ويوزعونهم على الخبابيز .
نستنتج ان كتاب المقالات والصحف الاكثر انتشارا هي الاكثر طائفية وعنصرية و اثارة للمشاعر , طبعا لان هالامور تدغدغ مشاعر الشعب الفاضي اللي يصدق اغلب هالصحف .
No comments:
Post a Comment